Voksa FC

Nyheiter SR Grendacup 2012

Tilbake til "SR Grendacup 2012"

Gullet kom heem!

Av Kristoffer Strand 19.08.12
..............................................................................................................................

Etterlengta debutant(ar), eit flott preparert anlegg, etterlengta sol, dramatikk til siste spark, mykje fin fotball og mykje mykje meir var berre noko av det årets SR Grendacup hadde å by på.

Alt gjekk vel så og seie som det skulle da Voksa FC saman med Sandsøy IL inviterte til årets hending, nemleg SR Grendacup på Oshaugane stadion laurdag 11. august. Det vart jobba på spreng til siste slutt med all førebuinga som skulle gjerast i dagane før cupen og den siste natta vart ikkje lysa i Oshaugane sløkte før klokka slo slaget halv 1 på natta.

- Vi har med god hjelp frå andre jobba hardt, ikkje berre for å få på plass alt til cupen, men også for å kunne sette ein standard slik at vi kan få den tradisjonsrike cuppen på kartet igjen, sa ein fornøgd klubbdirektør til VFC Nett. Han meiner også at cupen har tatt eit stort steg i riktig retning i høve fjoråret, men at det fortsatt er mykje å gå på.

- Vi lærer undervegs, vi skulle gjort slik eller vi skulle gjort sånn, men all lærdom er nyttig lærdom så får vi fortsette å byggje på det positive. Det er godt å sjå når det blir lagt ned så mykje arbeid at det kjem ein del folk og ikkje minst spelarar, sjølv om tre lag trakk seg frå turneringa, avslutta ein alt i alt meget nøgd klubbdirektør.

Da den store dagen var komen hang sola over Oshaugane akkurat som bestilt og med litt vind i håret var forholda til å sparke igong årets SR Grendacup nær perfekte. VFC TV med eit 3.19 timar langt oppsumeringsprogram samt eit utdrag ifrå baneopninga for 30 år sidan vart vist på ein skjerm i eit telt som var sett opp. Moglegheit for diverse merketaking i form av heading, teknikk og skyting m.m. var der. Ein skytevegg for dei treffsikre og eit bordtennisbord samt eit flott sekreteriat med speakerannlegg, kiosksal og ikkje minst mykje god fotball var noko av det SR Grendacup 2012 hadde å by på.

Som kjent klatra Voksa FC til topps og tok med det første trofeet i klubbens historie og det utan kaptein Anders Bringsvor bak roret på VFC skuta. Han spelte så og seie på alt anna enn Voksa FC, men da kapteinen "svikta", gjorde VFC spelarane mytteri og fekk skuta fort på rett kurs att. Det skal seiast at Anders fekk løyve frå leiinga.

Voksa FC varta til tider opp med festfotball og med resultat som: 3-0, 1-0 og 4-1 var det kun ein som ikkje var heilt nøgd med resultatet i siste kamp.

- Ja, målet var å halde nullen gjennom heile turneringa, så da er det ekstra surt at den sprekk i siste kampen, men alt i alt er eg strålande nøgd, sa VFC sin sisteskanse Magne Olsen som fekk god skryt frå det opmøtte publikumet.

Old boys-spelarane, som la ned god innsats, var også nøgde med dagen. Dei (Sandsøy mot Kvamsøy) spelte 2x20 minutt før Kvamsøy etter ein dramatisk straffekonk vart ståande att som vinnarar av old boys-klassa. VFC Nett gratulerer dei og minner på at ettersom dei stakk av med vandrepokalen, er dei nødt til å kome tilbake og forsvare den til neste år.

VFC Nett vil også kome tilbake med fleire detaljar rundt Voksa FC og SR Grendacup og du vil få svar på kven som endeleg debuterte for VFC.

Klubbdirektøren gratulerer klubben

Av Kristoffer Strand 15.08.12
..............................................................................................................................

Det har no gått nokre dagar sidan Voksa FC klatra til topps i årets SR Grendacup og etter at den prestisjefulle vandrepokalen har vore på vandring blandt spelarane i VFC, ankom den endeleg Voksa Stadium til klubbdirektørens store begeistring.

Det var manager Lasse Strand og spelar Kristoffer Strand som brakte pokalen til Voksa Stadium etter at den kvelden før var hos bringsvoringane Eirik og Thomas. Der vart det feira til langt på natt med mykje godt i "koppen" (pokalen). VFC Nett kjenner ikkje til detaljar rundt feiringa, men etter rykta og døme var det berre tvist pokalen var fylt med.

Den tidlegare hardt pressa klubbdirektøren i VFC var ein glad mann etter helgas prestasjon, og han storkosa seg med å halde klubbens første trofe. - Eg er stolt over å kunne stå her og halde klubbens første trofe, eg vil gratulere spelarane, leiinga, ja heile Voksa FC med eit vel gjennomført arrangement både sportsleg og utanomsportsleg, sa klubbdirektøren før han rettar merksemda mot ambisjonssaka. - Dette er eit bevis på at Voksa FC er ein hardtarbeidande klubb med ambisjonar om å nå til topps. Eg håpar no at vi kan rette merksemda mot det sportslege og at eg kan være med å drive klubben i rett retning.

Dermed er det berre ei utfordring att før trofeet er i boks, nemleg å byggje eit premieskåp det kan oppbevarast i.

Voksa FC og Kvamsøy til topps i SR Grendacup 2012!

Av Eirik V. Bringsvor 12.08.12

..............................................................................................................................

Det var arrangørlaget og øynaboane i sørvest som stakk av med vandrepokalane då årets fotballturnering for dei nærmaste bygdene vart avvikla i Oshaugane på Sandsøya i går. Arrangementet må seiast å vere ein suksess, sjølv om ein nok kunne tenkt seg meir publikum i det strålande vêret. Alt gjekk uansett knirkefritt arrangementsmessig, og ikkje minst; Voksa FC tok heim sin første tittel i klubben si hittil tre år lange historie!

I kampprogrammet til cupen stod det skrive: "Gullet ska' hem!". Og slik gikk det, i alle fall delvis. For i old boys-klassa måtte "heimelaget" Sandsøy ta til takke med ein heiderleg andreplass etter at oppgjeret mot Kvamsøy måtte avgjerast frå straffemerket. Der var forresten kvaliteten imponerande høg, då berre eitt forsøk ikkje gjekk i nota - og dette gjekk endåtil i tverrliggaren og ned på streken før ballen spratt ut att. Nokon av spelarane meinte at ballen var over streken, men film frå VFC TV viser at så ikkje var tilfelle. Dermed skal vandrepokalen for old boys-klassa overvintre på Kvamsøya.

Men i aktiv-klassa gjekk det vegen for "heimelaget". Voksa FC leverte solid innsats, og med berre eitt innsluppe mål var det heilt fortjent at ein gjekk til topps og tok heim sin første tittel i klubbhistoria. Denne gongen stilte VFC eit sterkare lag enn nokon gong før. Rett nok var ikkje Anders Bringsvor på laget denne gongen, sidan han skulle representere Sandsøy sitt old boys-lag. Men jammen meg dukka han opp for Kvamsøy i kampen mot Voksa FC, heldigvis til ingen nytte for dei oransje naboane. Det mest gledelege for VFC var at brørne Ingar og Vebjørn Støyle Bringsvor høvesvis debuterte og gjorde comeback med braksuksess. Vebjørn var med frå første kamp, og gjorde ein imponerande og solid innsats, medan Ingar i utgangspunktet skulle filme cupen for VFC TV. Det kribla nok i beina der han sat på taket til det som var kombinert speakerbu og filmetårn.

Før den andre kampen til Voksa FC, mot Kvamsøy, drog han heim for å hente drakt og fotballsko. Dermed gjekk han rett inn på laget. Mot Kvamsøy vart det berre nesten, men i finalen viste han alle dei eigenskapane vi veit han har, då han hjalp laget til siger med to fine scoringar. Elles gjorde Martinus Helland, austlending med familie frå Sandsøya, ein fin gjesteinntreden i forsvaret til VFC. Torstein Helland Hansen var også tilbake i den raude drakta, medan det er verdt å merke seg at Vegar Prozenko var fråverande. Duoen Sondre Voksøy og Christoffer Bringsvor, begge elleve år i år, fekk også speletid i samtlege kampar. Det er også verdt å nemne at keeper Magne Hauge Olsen var sterkt delaktig i den suksessrike og solfylte laurdagen, den 11. august 2012 - ein dag vil stå med gullskrift i Voksa FC si stolte historie.

KKampfakta:

AKTIV-KLASSA: INNLEIANDE KAMP

Voksa FC - Larsnes 3-0

Dommar: Petter Lyshol

Mål VFC: Kristoffer Strand, Vebjørn S. Bringsvor, Eirik V. Bringsvor

Lagoppstilling VFC: Magne H. Olsen | Martinus Helland - Eirik V. Bringsvor | Torstein H. Hansen - Thomas V. Bringsvor - Stian Sande | Kristoffer Strand

Innbytte: Sondre V. Bringsvor, Christoffer Bringsvor, Emil G. Sandsbakk, Vebjørn S. Bringsvor

Kampen: Opningskampen var det dei raud-svarte vertane og eit Larsnes-lag beståande av vel så mange vanylvingar som sandssokningar som fekk æra av å spele. Med sola oppe på ein himmelblå himmel og ei grusbane i verdsklasse, låg det an til fin fotball. Og det vart det, i alle fall delvis. I starten var det mest ein stillingskrig på midten av bana utan dei store sjansane, men etter kvart vart det tydeleg at Voksa FC var laget med dei beste ferdigheitene, totalt sett. Heimelaget var nok litt usikre på dei unge "larsnesingane", men så snart ein fekk prøvd seg fram, vart det meir og meir sting i VFC-spelet. Tre ballar gjekk i løpet av dei 20 minutta inn bak larsneskeeperen. Dei to første var frå kort hald ved Kristoffer Strand og Vebjørn Støyle Bringsvor, medan Eirik Voksøy Bringsvor fekk eit godt treff på det siste målet, då ballen vart plassert fint nede i venstre hjørne på halv volley.

OLD BOYS-KLASSA: FINALE - 1. KAMP

Sandsøy - Kvamsøy 1-0

Dommar: Tor Arne Bringsvor

Mål SIL: Anton Helland

Kampen: Det var knytta ein del spenning rundt dei to old boys-laga som stilte opp for å måle krefter. Spente var dei nok sjølve også, og alle veit at å gå rett frå mange år utan trening rett til ein prestisjefylt kamp med tøffe duellar sjeldan er noko lurt med tanke på skader osv. Difor var innleiinga nokså roleg. Lite prating og synleg engasjement, mykje spel rundt midten, og få målsjansar var mest dekkande for dei første minutta. Etter kvart tok det seg derimot opp, og Sandsøy fekk eit lite overtak spelemessig. Det resulterte også i eit mål og eit godt utgangspunkt til "returkampen" (andre omgang) 40 minutt etterpå.

AKTIV-KLASSA: INNLEIANDE KAMP

Larsnes - Kvamsøy 5-0

Dommar: Petter Lyshol

Mål LIL: Foreløpig ukjent

Kampen: Det var etter første kampen ei viss spenning om Larsnes kunne utfordre eit Kvamsøy-lag beståande av ein sterk stamme, men også med ein del usikre kort. Kanskje var første kampen ei god gjennomkøyring (ikkje minst tilvenning til grusunderlag) i så måte. For Kvamsøy hadde trøbbel frå start til slutt med dei unge og kvikke gultrøyene. Til tider var det stor Larsnes-dominans, og dei ga seg ikkje før det stod 5-0 i målprotokollen. Eit sterkt tilbakeslag, og ein kjedeleg opningskamp for Kvamsøy, som dermed måtte slå Voksa FC i siste kamp for å kunne gå til finale.

FINALE - 2. KAMP

Kvamsøy - Sandsøy 4-3 (samanlagt 4-4, Kvamsøy vinn 5-3 på straffer)

Dommar: Tor Arne Bringsvor

Mål KIL: Runar Kvamme 3, Martin Ball

Mål SIL: Anton Helland, Kenneth Rusten, Endre Vorren

Kampen: Om den første finalekampen var kjedeleg og sjansefattig, vart dei avgjerande siste 20 minutta alt anna enn det. Kvamsøy hadde eitt mål å ta igjen, og viste tidleg at dei var til å rekne med. Sandsøy tok først leiinga ved målsniken Anton Helland, før Kvamsøy snudde til 2-1. Endre Vorren utlikna for SIL, men gjestane, anført av ein opplagt (og litt vel ung...?) Runar Kvamme, gjekk så opp til 4-2 (4-3 samanlagt). Det hyggelege bekjentskapet engelskmannen Martin Ball putta også, til stor jubel frå publikum. Men vertane nekta å gi seg der, og heilt på tampen fekk Kenneth Rusten (ur-Sandsøying busett på Kvamsøya) godt treff og sette inn utlikninga samanlagt. Likevel gjekk vandrepokalen til Kvamsøy, etter at dei sette fem av fem straffer i mål, medan Sandsøy missa på eitt i den avgjerande straffesparkkonkurransen.

AKTIV-KLASSA: INNLEIANDE KAMP

Kvamsøy - Voksa FC 0-1

Dommar: Svein Helge Bringsvor

Mål VFC: Thomas V. Bringsvor

Lagoppstilling VFC: Magne H. Olsen | Martinus Helland - Eirik V. Bringsvor | Torstein H. Hansen - Thomas V. Bringsvor - Vebjørn S. Bringsvor | Ingar S. Bringsvor

Innbytte: Sondre V. Bringsvor, Christoffer Bringsvor, Emil G. Sandsbakk, Stian Sande, Kristoffer Strand

Kampen: Premissane var klare; Voksa FC klarte seg med uavgjort, medan Kvamsøy måtte vinne. Samtidig var dette siste kampen før finalen, og med berre 20 minutt pause før den, låg det i bakhovudet til VFC-spelarane at ein burde bruke minst mogleg krefter. Kampen bar også preg av dette. Dei første minutta (eigentleg heile kampen) var nokså jamnspelte og utan store sjansar. Kvamsøy var frampå eit par gongar, men det var Voksa FC som tok leiinga då eit framlegg frå Thomas Voksøy Bringsvor gjekk rett i mål etter effektiv forstyrring frå Kristoffer Strand. Deretter ebba kampen eigentleg ut med 0-1, men spenninga var heile tida til stades. Hadde Kvamsøy fått sitt første mål, kunne mykje fort sett annleis ut. Elles er det verdt å nemne at Anders Bringsvor spelte FOR Kvamsøy MOT Voksa FC i denne kampen, fordi dei oransje frå sørvest pussig nok leid av mannskapsmangel.

AKTIV-KLASSA: FINALE

Voksa FC - Larsnes 4-1

Dommar: Petter Lyshol

Mål VFC: Ingar S. Bringsvor 2, Kristoffer Strand, Christoffer Bringsvor

Lagoppstilling VFC: Magne H. Olsen | Martinus Helland - Eirik V. Bringsvor | Kristoffer Strand - Thomas V. Bringsvor - Stian Sande | Ingar S. Bringsvor

Innbytte: Sondre V. Bringsvor, Christoffer Bringsvor, Torstein H. Hansen, Vebjørn S. Bringsvor

Kampen: Endeleg var den der, finalen i aktiv klassa! Voksa FC hadde venta på denne i over eitt år sidan det forsmedelege nederlaget for Åram i 2011-utgåva. Denne gongen skulle det gå annleis - det var heile laget klare over. Ringen for dagen og cupen var på mange måtar slutta, i og med at motstandarlaget var Larsnes, akkurat som i opningskampen. Men i finalen var bildet endå klarare. VFC tok kommandoen frå start, og gultrøyene på motsett halvdel var nok klare over at her måtte dei spele og duellere over evne for å ha ein sjanse i det heile. Anført av Ingar Støyle Bringsvor, i sin andre kamp for klubben, gjekk Voksa FC rett i angrep. Han bidrog sterkt med sine to mål, begge skot frå om lag åtte meter, og han serverte også Kristoffer Strand på det tredje målet. Det fjerde målet var det ungguten Christoffer Bringsvor som stod for - ei flott avslutning etter eit gjennomspel i midten. Det var difor ei mager trøyst for Larsnes då dei etter mykje klabb og babb i feltet fekk tuppa inn ei redusering. Men denne dagen var det ingen som kunne ta i frå Voksa Football Club sin første tittel i klubbhistoria. Ironisk nok hadde dei fleste gått, då pokalen vart delt ut og laget avbilda framfor reklameskiltet for cupsponsor Sande Rekneskap AS. Berre dei mest ihuga supporterane (2-3 stk) stod igjen...

SR Grendacup stadig nærmare - dato framleis uviss

Av Eirik V. Bringsvor 21.05.12
..............................................................................................................................

Som tidlegare nemnt har vi lova å kome tilbake med meir info så snart det skjer noko vedrørande årets Grendacup. Og det har det. For det første har Sande Rekneskap, Voksa FC sin hovudsponsor, gått inn som ein del av namnet til cupen, og for det andre har ein kome eit par steg nærmare i å få på plass lag til cupen. Det einaste usikkerheitsmomentet er dato for den store dagen...

For det er mange hensyn som må takast når dato skal fastleggast. Det bør helst passe for dei laga som vi inviterer, og i tillegg er det artig dersom andre omstende gjer at det kan vere over gjennomsnittet med tilskodarar under arrangementet. Også at hovudpartane i Voksa FC kan vere til stades er ønskjeleg. Til slutt er der ein variabel som seier at tid er mangelvare, og at der må vere tid nok på førehand, slik at arrangementet blir best mogleg.

Vi har koka det ned til nokre aktuelle datoar. Desse er:

Laurdag 16.juni - sikkert i tidlegaste laget, men elles er der ingenting i vegen for denne dagen.
Laurdag 23.juni - jonsokaftan med feiring på Sandshamna på ettermiddag/tidleg kveld, elles perfekt (kanskje perfekt uansett..?)
Laurdag 7.juli - Stedje-helg på Rosenlund. Kanskje ikkje best likevel, med tanke på at det er første helga i fellesferien.
Laurdag 11.august - kanskje det beste alternativet, sidan det i år ikkje er Kong Arthur-spel. Men klarer vi vente sååå lenge då...!?!?

Planlegginga av årets cup er i gang!

Av Eirik V. Bringsvor 01.05.12
..............................................................................................................................

Våren er komen og vêret vert stadig varmare. Voksa FC er no godt i gang med planlegginga av årets SR Grendacup som forhåpentlegvis vil gå av stabelen ein laurdag i månedsskiftet juni/juli. Det meste er framleis usikkert, men her kan du lese kva planane for i år er!

Denne gongen vil arrangementet ligge meir under Sandsøy Idrettslag. Det er for at vi lettare skal kunne organisere cupen, både med tanke på lag, anlegg, kiosk/fasilitetar, dommarar osv. I tillegg har Sandsøy IL to jubileum i år; idrettslaget fyller i september 40 år, og i april var det 30 år sidan Oshaugane Stadion vart opna.

Dato for hendinga er framleis uklart, men laurdagane 23.juni og 7.juli er per dags dato dei mest aktuelle. Ein prøver også å samkøyre med Rosenlund Marina på Sandshamn med tanke på eit arrangement der på kveldstid.

Nytt av året er at vi vil prøve å arrangere to klasser; Old Boys og Aktiv. Det er for å kunne gi eit godt tilbod til interesserte i alle aldrar, og for underhaldningsverdien sin del, sjølvsagt! Vi ser føre oss ein cup av dette formatet:

Old Boys-klasse for spelarar over 35 år - maksimalt to stk. per lag kan ha spelt fotball på aktivt nivå i år.
Aktiv-klasse for spelarar over 16 år - kan gi dispensasjon for underårige.
Kampar i 5ar-, 6ar- eller 7ar-fotball alt etter kor mange spelarar kvart lag klarer å stille med.
Speletid på 10-15 minutt per omgang.
Deltakarlag i Old Boys: Sandsøy, Kvamsøy, Larsnes + evt. fleire.
Deltakarlag i Aktiv: Voksa FC, Kvamsøy, Åram, Larsnes + evt. fleire.

Vi kjem tilbake med meir info dersom planlegginga tek nye steg og når det nærmar seg!

Null!

Av Eirik V. Bringsvor 11.08.12

............................................

Så er dagen komen - i dag går den omfattande fotballturneringa SR Grendacup av stabelen på Oshaugane Stadion på Sandsøya! Etter lang tids planlegging, og kortare tids gjennomføring av planar, er endeleg det meste på plass, og alt ligg til rette for ein artig fotballdag. Oppmøte er såleis obligatorisk, og arrangøren kan lokke med diverse aktivitetar og visuelle godbitar i tillegg til kampane som skal avviklast.

Laurdag 11. august har vi sett fram til i lang tid. No er dagen komen. Fokus for ein slik dag må då vere å gripe augneblinken for alt den er verdt, og gjere dagen til ein dag vi seint vil gløyme.

Samanlikna med fjorårets relativt suksessrike Grendacup, er årets utgåve ein del større. I år stiller to old boys lag, Sandsøy og Kvamsøy, til dyst i tillegg til tre lag i aktiv-klassa. Desse er i år Larsnes, Kvamsøy og Voksa FC. Dermed blir det seks kampar totalt. Elles på bana er det lagt opp til diverse aktivitetar av ulikt slag. Bordtennis, minifotballbane, blinkvegg og merketaking er verdt å nemne.

Denne gongen har det også vorte sett opp eit telt, der det vil bli vist film langs med cupen. Det er i hovudsak eigeprodusert VFC TV og tilbehør, men også nokre klipp frå baneopninga i Oshaugane frå 1982 er med i totalpakken som TV-redaksjonen har sydd saman. I teltet vil det også vere mogleg å kjøpe medlemsbladet VFCSC ved å melde seg inn i supporterklubben. Arrangementsstaben har også rigga til ei kombinert speaker-bud og filmetårn. Dermed vil det vere musikk på høgtalaranlegg, speakerteneste og filming av det aller meste av det sportslege. Kiosken vert også vidopen frå start til slutt, som vanleg.

Ein!

Av Eirik V. Bringsvor 04.08.12

............................................

Då er det berre ei einaste veke att. Det meste av planleggingsarbeidet er spikra, avtalar gjorde, og no står berre utføringa att. Den komande veka vil det vere ymse aktivitet i Oshaugane for å klargjere til årets SR Grendacup på Sandsøya. Men viktigast av alt - deltakarlaga må bekreftast.

Sist torsdag vart det arrangert eit lite cupmøte der leiinga i Voksa FC og Sandsøy IL var representert. Ein fekk presisert korleis ein ser føre seg cupdagen vere og oppgåver vart fordelte. Arrangementet står offisielt under Sandsøy IL, med Voksa FC som stolt medarrangør. Sidan både idrettslaget og idrettsbana jubilerer i år, prøver ein å få til forskjellige aktivitetar i tillegg til fotballkampane. Vi kan nemne merketaking, konkurransar og diverse tilrettelegging for aktivisering.

Det som gjenstår med ei veke igjen, er å få bekrefte/avkrefte at dei inviterte laga faktisk kjem. Ganske sikre er Voksa FC og Sandsøy, medan frå Kvamsøy kan aktiv-laget bortimot garanterast, medan old boys-laget er meir usikkert. Når det gjeld Åram, har ein fått garantiar for lag i begge klasser, men det trengst ei bekrefting, då ein ikkje har vore i tale med dei ansvarlege på nesten ein månad. Larsnes old boys kjem truleg til å stille same laget som i fjor (med eller utan bein...). Eit yngre lag frå den såkalla landsbyen var derimot usikkert i lang tid, men det ser no ut til at ein garde av 15-16-åringar vil forsvare den gule drakta.

Cupleiinga vil altså prøve å kontakte dei aktuelle laga innan kort tid for å få bekrefta ankomst neste laurdag. Forresten er det vedteke at cupen startar 12.30, i samband med at ferja kjem til Voksa frå Larsnes/Åram 12.15. Kvamsøy spelar sine første kampar rundt 13.30, sidan dei kjem med ferja 13.00. Då er det berre å krysse fingrane og håpe på godt fotballvêr neste laurdag. Om alt går etter planen, vert dette ein stordag for både Voksa FC og Sandsøy IL!

To!

Av Eirik V. Bringsvor 28.07.12

............................................

Denne helga er vi allereie halvvegs i nedtellinga til SR Grendacup laurdag 11. august. I dag er det berre to veker igjen, og den siste veka har ein del brikkar falle på plass. Men som vanleg står det framleis også ein del att.

Forrige søndag gjorde cupkomiteen eit stort framsteg, då ein inngjekk avtale med Helge Johnny Voksøy og Rosenlund Marina AS om lån av både speaker-/høgtalaranlegg og "storskjerm". Denne skjermen, eit lerret på 2 x 2 meter med tilhøyrande kanon, vert sett opp i eit telt for å skjerme skjermen for sollys (vonleg blir det nettopp det!). I motsett fall for å halde det tørt ved regnvêr. Eit slikt telt er også tinga hos ungdomslaget. Dette er på om lag 3 x 6 meter, og kan bli brukt til skjerming av skjerm. Kanskje vert det nytta til speaker- og alt-mogleg-telt. I så fall må "storskjermen" plasserast i ei anna løysing.

På den sportslege fronten står ein eigentleg på staden kvil. Det einaste nye er at Larsnes-laget til aktiv-klassa ikkje kan garanterast enno, men sjølvsagt jobbar ein med saka. Arrangementskomiteen prøver også å få til eit samarbeidsmøte med sentrale personar tidleg i neste veke for å lufte diverse idear for cupdagen og for å sjekke ståa for t.d. Sandsøy Old Boys.

Dermed ser det ut til at det blir ein stor dag, laurdag om to veker. Utover i neste veke håper vi at meir vil falle på plass, og vi er tilbake med neste artikkel i nedtellinga om sju små dagar!

PS: Vi kan også nemne at eit nytt nummer av supporterbladet Voksa-patrioten vil kome ut i løpet av dei to neste vekene. Har du ikkje meldt deg inn i supporterklubben enno, så bør du gjere det no, for bladet ser absolutt ut til å vere verdt å lese - der er meir eksklusivt stoff enn her på nettsida. Det vil også vere mogleg å kjøpe bladet, og dermed også medlemsskap, på cupdagen. Kontigenten er på usle 50 kr. Du kan også sende ein e-post til voksafc@hotmail.com eller send SMS til anten 994 22 824 eller 932 61 120.

Tre!

Av Eirik V. Bringsvor 21.07.12
............................................

Tida flyg i kjend stil, men arrangementstaben står på stedet hvil! Det er i korte ordelag dekkande for kvar vi i dag står, når det er tre veker igjen til SR Grendacup 2012 på Sandsøya!

Dersom ein les mellom dei to korte linjene, fårstår ein altså at den siste veka ikkje har ført til yttarlegare framgong i planlegginga og førebuinga til årets turnering. Det vi likevel kan melde om når det denne helga berre er dryge 20 dagar til elden vert tent, er at det dei komande dagane vil kome til å skje tilsvarande mykje. For no må det meste spikrast og dei konkrete planane setjast ut i livet på ein eller fleire måtar.

Fylg med i dagane framover, så kanskje kjem det rykande ferske nyhende om cupen. Neste helg er vi i alle fall tilbake med ei oppsummering når berre to små veker gjenstår!

Fire!

Av Eirik V. Bringsvor 14.07.12
............................................

Nedtellinga til årets største hending startar offisielt denne helga. Det er no berre fire veker igjen, og sjølv om ein stor del av planleggingsgrunnlaget er lagt, står det att ein del arbeid til å gjere desse siste vekene. Uansett ser det no ut til at augusthelga også i år vert å trakte etter. Vi snakkar sjølvsagt om SR Grendacup 2012!

Kvar veke fram mot cupen den 11.august vil VFC Nett kome med oppdateringar rundt arrangementet. Denne gongen kan vi berre melde om at dei fleste laga har meldt at dei vil delta, og at planane elles for hendinga ikkje er kome lenger enn planleggingsstadiet. Men fortvil ikkje, til gjengjeld er desse planane spektakulære! Vi kan nemne at ein prøver å få til eit telt med storskjerm inni, der det vil bli vist klipp frå baneopninga i 1982 og ymse frå det VFC TV har produsert.

Neste helg vil vi kome tilbake med enda meir nytt i neste del av nedtellinga!