Voksa FC

Nyheitsarkivet

Mykje nytt, og ikkje minst; VFC TV nr. 5 er ute no!

Av Kristoffer Strand 30.06.12
........................................................................................................................................ 

Er det lenge sida du har snusa rundt i alle krikar og krokar her på sida, så er det i alle fall på tide. Du kan starte med å stikke nasa innom ”A-laget”, der har adelskalenderen vorte oppdatert og anna flisespikkeri. Kan du endå ikkje når, kvar og kven som stifta klubben på rams så kan ”Om klubben” vere neste stopp. Har du endå ikkje betalt medlemskontingent og lurar endå på korleis og kvifor melde seg inn i supporterklubben, kan det vere lurt å besøke ”VFCSC” avdelinga. Sjå reklamevideoen og les litt om kva fordelar du får av å vere supporter, så reknar vi med at klubben straks høyrer frå deg. 


Er det noko du er einig eller ueinig om er det berre å diskutere i vårt ”diskusjonsforum”, er du fortsatt lysten på meir så kan det vere fint å ta en titt innom ”Fotogalleriet”. Der blir det stadig lagt ut nye bildar og situasjonar frå folk i og rundt Voksa FC. Har du endå ikkje fått nok av oss så kan eg kome med den gledelige nyhendinga at VFC TV nr 5! Kom ut for ei vekes tid sida (vi likar ordtaket ”betre sein en aldri” ekstra godt her i VFC). Der får du blant anna sjå trekninga av Grendacupen, den litt uvanlige pressekonferansen og ein ny kviss vart sluppen. Vi minner også om at VFC TV 6 allereie er under innspeling og med det kan VFC nett avsløre at vinnaren av påskenøttene blir annonsert, og den samla vinnaren frå alle dei andre kvissane som har vore på slutten av kvar sending vil bli premiert. Så heng med framover!

PS! Det er enno ikkje for seint å sende inn svar på både kvissane og påskenøttene. Gjer du det er du med i trekninga av flotte premiar! Svara sender du til voksa@hotmail.com.

Grendacup 2011

Av  Eirik V. Bringsvor 21.06.11
........................................................................................................................................ 

Det er no nokre dagar sidan årets Grendacup på Sandsøya vart arrangert og roa har igjen lagt seg over både folk og fe i VFC-leiren. Og då er det på tide å kome med ei noko forsinka, men dog god, oppsummering av det som føregjekk på grusbana i Oshaugane laurdag.

For det vart ein innhaldsrik dag sist laurdag då Voksa FC i samarbeid med Sandsøy IL lukkast med å gjennomføre årets Grendacup etter lange og intensive førebuingar dagane og natta før. Laurdag morgon fekk arrangementsansvarleg melding om at Kvamsøy ikkje makta å stille lag, og dermed måtte kampoppsettet endrast og det vart i samråd med deltakarlaga bestemt å gjennomføre ein kortare cup enn planlagt. Kvart av laga spelte først to kampar i innleiande runde, altså ein kamp mot kvart lag, før dei to beste gjorde opp om tittelen i finalen. Totalt vart det dermed gjennomført fire kampar - halvparten av det planlagde.

Men laga var fornøgde med dagen (sjølvsagt sett vekk i frå dei to helikopterbesøka). I opningskampen møtte arrangør Voksa FC Larsnes sitt old boys-lag. VFC var hakket vassare kampen gjennom og tok ein komfortabel siger 6-0. I den andre kampen møtte heimelaget tøffare motstand i form av eit ungt Åram-lag (i realiteten meir Fiskå enn Åram...). Etter ein mållaus første omgang fekk gjestane det avgjerande målet like før slutt i ein ellers jamn og spennande kamp, der Voksa FC ikkje var nøyaktige nok framfor mål.

I tredje og siste gruppespelskamp fekk VFC kjærkomen kvile medan Åram og Larsnes gjorde opp seg i mellom. Larsnes hadde før denne kampen sendt ein spelar på båre med helikopter, og timen seinare måtte medisinsk assistanse tilkallast igjen. Likevel stilte dei gul-svarte sporty opp og gjennomførte sine to kampar, og mot Åram klarte dei til stor sympati frå publikum å score to mål. Kampen enda 7-2 i Åram-favør, men det er grunn til å tru at dei unge vanylvingane ikkje brukte alle kreftene sine, sidan finaleplassen i realiteten var klar allereie.

Sola tok meir og meir tak over Oshaugane Stadion utover dagen, og bana vart etterkvart nokså tørr og sandstøvet virvla seg opp overalt. Finalen vart like jamn som gruppekampen mellom Voksa FC og Åram, men i denne kampen tok gjestane leiinga i første omgang ved Per-Gunnar Lundehaug. Etter dette kom VFC meir og meir frampå og var det førande laget i store delar av kampen. Likevel var det Åram som gav ein ny kalddusj like etter pause då Henning Sætre sørga for tomåsleiing. Voksa FC fortsette trykket, men makta ikkje å redusere før knappe tre minutt gjenstod då Thomas Voksøy Bringsvor sette inn ein retur. Tidlegare hadde Anders Bringsvor missa på ein liknande 100 %-sjanse (det skal nemnast at det var ei kjemperedning av Åram sin gode og unge keeper Ådne Seljeset).

Dermed kunne Åram reise heim med sigeren i årets Grendacup, men likevel var Voksa-spelarane sånn passa fornøgde med dagen og andreplassen. Det som var minst like viktig var at dei to Larsnes-spelarane som måtte flygast til sjukehus med hhv. beinbrot og hjarteproblem er tekne hand om og i god behold! VFC-leiinga kunne dermed seie seg fornøgde med solid gjennomført Grendacup, både sportsleg og utanomsportsleg, og håper at turneringa som tidlegare vart arrangert kvart år i desse tider med dette er "back in business"!


Kampfakta:
Voksa FC - Larsnes 6-0
Mål VFC: Anders Bringsvor, Stian Sande, Kristoffer Strand 2, Eirik Voksøy Bringsvor, Kjell Even Toftesund
Dommar: Endre Vorren, Sandsøy IL
Lagoppstilling VFC: Magne Hauge Olsen | Eirik Voksøy Bringsvor | Stian Sande - Anders Bringsvor - Thomas Voksøy Bringsvor - Kjell Even Toftesund | Emil Gashi Sandsbakk
Innbytte: Kristoffer Strand, Lasse Strand Gule

Åram - Voksa FC 1-0
Mål Åram: Sjølvmål VFC
Dommar: Tor Arne Bringsvor, Sandsøy IL
Lagoppstilling VFC: Magne Hauge Olsen | Eirik Voksøy Bringsvor | Stian Sande - Anders Bringsvor - Thomas Voksøy Bringsvor - Kjell Even Toftesund | Kristoffer Strand
Innbytte: Emil Gashi Sandsbakk, Endre Vorren, Lasse Strand Gule

Larsnes - Åram 2-7
Mål Larsnes: Ukjent
Mål Åram: Ukjent
Dommar: Svein Helge Bringsvor, Sandsøy IL

Finale: Voksa FC - Åram 1-2
Mål VFC: Thomas Voksøy Bringsvor
Mål Åram: Per-Gunnar Lundehaug, Henning Sætre
Dommar: Svein Helge Bringsvor, Sandsøy IL
Lagoppstilling VFC: Magne Hauge Olsen | Stian Sande - Thomas Voksøy Bringsvor | Kristoffer Strand - Anders Bringsvor - Kjell Even Toftesund | Eirik Voksøy Bringsvor
Innbytte: Emil Gashi Sandsbakk

PS: Bilete og mykje meir frå cupen finn du på Grendacup-sida og fotogalleriet!

Fornøgd med gjennomføringa!

Av  Kristoffer Strand 20.06.11
........................................................................................................................................ 

Styret i Voksa FC kunne ikkje anna enn å vere fornøgde med ein vel gjennomført Grendacup 18.06.2011. VFC jobba på spreng dei siste dagane og timane før cupen både for å få på plass det sportslege og ikkje sportslege. Det har vore så hektisk rundt klubben at VFC Nett ikkje har klart å kome i kontakt med medlem frå styret før i dag.

 
- Ja natt til den 18. hadde vi eit styremøte frå kl 9 på kvelden og det varte heile 5 timar! sa ein sliten klubbdirektør Kristoffer Strand før han fortsette:
- Der vart det jobba på spreng for å få på plass dommarar, korleis arrangementet skulle gjennomførast og diverse anna.
Dagleg leiar Eirik V. Bringsvor jobba med å skrive ut kampoppsett og kampprogram, medan han skraut iherdig av den nye skrivaren på Voksa FC sitt kontor. Både han, Thomas V. Bringsvor og Lasse Strand kan vente seg skyhøge telefonrekningar i næraste framtid.
 
- Det begynte å bli litt trasig da vi vart anklaga for telefonterror, men vi klarte i tolvte time å skaffe oss akkurat nok dommarar, sa ein lettpusta dagleg leiar Eirik V. Bringsvor medan Thomas V. Bringsvor skyt inn at han vurderar å sende telefonrekninga til Sande Rekneskapskontor.
Vidare satt Kristoffer Strand og redigerte siste utgåve av VFC TV medan han prøvde å få kontroll over situasjonen. Thomas V. Bringsvor stod for kvalitetssikring både av VFC TV og cupen generelt.
- Det er viktig at ting blir gjort rett, sa den ferske sivilingeniøren.
 
Da den store dagen var over og redningshelikoptret hadde vore på besøk heile to gongar medan Åram gjekk til topps i årets Grendacup, kunne Voksa FC puste letta ut etter eit vel gjennomført arrangement. Klubbdirektør Kristoffer Strand understrekar at det ikkje hadde vorte noko av dette arrangementet utan hjelp ifrå forskjellige hald:


- Klubben vil gjerne takke Sandsøy IL for samarbeidet i form av lån av bane og gjennomføring av kiosk. Arnvald Bringsvor for merking av bane og stelling rundt, alle dommarane som stilte opp på så kort varsel (håpar vi kan spørje igjen ved ei seinare anledning?), og ikkje minst Larsnes og Åram som torde og stille opp på den motsette banehalvdelen mot Voksa FC. Eg takkar alle involverte i klubben, og har eg gløymd nokon no så takkar eg dei og! avslutta ein veldig takkesaleg klubbdirektør.

Så gjenstår det å sjå no da om Voksa FC har klart å gjeninnføre den tradisjonsrike Grendacupen!


Vel gjennomført Grendacup, tross alt!

Av  Eirik V. Bringsvor 18.06.11
........................................................................................................................................ 

Det vart ganske så innhaldsrikt på Oshaugane Stadion i dag både sportsleg og utanomsportsleg. Til slutt var det Åram som kunne stikke av med tittelen i årets Grendacup etter siger 2-1 mot Voksa FC i ein jamnspelt finale. Siste timen før arrangementstart måtte kampoppsettet endrast etter at Kvamsøy måtte melde avbud pga. spelarmangel, så cupen vart korta ned til fire kampar. Likevel var dei fleste nøgde med dagen der det endåtil vart vist siste sending frå VFC TV på eit fjernsyn ved koisken. Dessverre måtte også eit ambuansehelikopter kome til Sandsøya to gongar, først etter eit ankelbrot på ein Larsnes-spelar, og så for å hente endå ein spelar frå dei gul-svarte som hadde fått eit illebefinnande i hjarte og pust. Meir om cupen inkludert bilete og reaksjonar kjem etterkvart!

Det meste på plass før cupen

Av  Eirik V. Bringsvor 17.06.11

........................................................................................................................................  

Men framleis er det ein del som må organiserast før alt er klart. Likevel har dei to siste dagane vore positive for Voksa FC. Samarbeidet med Sandsøy IL er godt, og både kiosk og bane er ordna. Lån av fleire bord/benkar frå Dollstun er på plass og desse vil bli køyrt til bana enten i løpet av kvelden eller i morgon tidleg. Det er imidlertid ikkje alt som er på plass enno, men arrangementstaben jobbar med opptil fleire ting om gongen.

Det vanskelegaste å få på plass etter at cupen vart spikra tirsdag, har vore spelarar til eige lag i tillegg til dommarar. Vi har hatt eit håp om å få på plass minimum fire pipeblåsarar slik at kvar dømmer to kampar, men det ser no ut som at det er vanskeleg. Likevel er det godt over eit halvt døgn att til første kamp, så ikkje bli forundra om vi dreg både ein og to dommarar opp av hatten (om vi berre finn hatten så...)! Elles er kiosk og bane som nemnt ordna. Kiosken vil bestå av det ordinære utvalet der er til vanleg, men kanskje kan vi tilby nokre ekstra godbitar! Dette er ikkje heilt bestemt enno. Lørdag morgen vil Arnvald Bringsvor bistå når bana skal oppmerkast, og tildlegare i dag (fredag) var underteikna i Oshaugane og jamna grusen så bana blir meget fin!

Seinare i kveld kjem VFC Nett kanskje med endå ein statusrapport frå cupen, der det vi veit om deltakarlaga vil bli presentert i tillegg til annen informasjon som måtte kome på plass til den tid! Uansett håper vi flest mogleg vil ta turen til idrettsbana i morgon rundt halv eitt (første kamp 12.45). Utover dagen går det slag i slag fram til finalen klokka 17.45. Det kan sjølvsagt bli endringar i tidene, men marginane i oppsettet er såpass store at vi trur at det vil gå etter planen.

Meir info og alt av Grendacup-stoff vil bli lagt ut på denne sida der vi samlar det som finst om cupen!


Brikkane fell på plass i Grendacup-puslespelet!

Av  Eirik V. Bringsvor 14.06.11

........................................................................................................................................

Vi har i dag kome eit langt steg nærmare i å bekrefte Grendacupen som no etter alt å døme går av stabelen komande laurdag! Larsnes har bekrefta laget sitt, medan Åram visstnok skal vere i ferd med å samle seg. Kvamsøy har fleire gongar lova å stille lag, og då gjenstår berre oss sjølve før det heile er spikra - men det viser seg at det fort kan bli oss sjølve som får dei største bemanningsproblema... Ein ting er likevel sikkert: VFC-leiinga jobbar med saka!

PS. Vi har også oppretta ei eiga Grendacup-side der ymse info og raritetar vil dukke opp både i forkant og etterkant av arrangementet! Følg med her framover mot helga! 

Dagane fram mot laurdag vert difor nokså hektiske for VFC-leiinga, for det er mange ting som må på plass sidan ein har venta med dei store førebuingane til arrangementet vart spikra. Og no er det det!


VFC TV-sending nr. 5

Av  Kristoffer Strand 09.06.11

........................................................................................................................................

VFC Nett kan i dag avsløre til alle våre sjåarar, at det femte VFC-TV er under innspeling. Vi kan dessverre ikkje fastslå enda når programmet vil vere ferdig, men lovar til alle dei som siklar over tastaturet at kvaliteten ikkje verte dårlegare med sendingane! VFC-Nett har ikkje lov til å avsløre kva programmet skal innehalde, men eit gjensyn med den ivrige banemannen og ein duell skal dykk ikkje sjå bort ifrå. Vinnaren av påskekvissen må jo også kårast, så fylg med framover kanskje er det du som sit igjen med ein flott premie!

PS: Det er enno ikkje for seint å sende inn svar/løysningsord til voksafc@hotmail.com og premien kan bli din! Dykk kan også diskutere i vårt diskusjonsforum kva innslag dykkar likte best frå dei tidlegare sendingane, vi blir glade for å få tilbakemeldingar frå sjåarane.

Diskuter her!


Skade og dobbel skade!

Av  Kristoffer Strand 02.06.11
........................................................................................................................................ 

Det rapporterast om eit par skader i Voksa FC-leiren, og skal vi tru leiinga av klubben så er det eit par for mykje. - Ja, vi har fått eit par skader på eit ugunstig tidspunkt. Vi er i ferd med å starte oppkøyringa til den omtalte Grendacupen den 18.juni, så da kunne ikkje timinga vore betre, sa ein tydelig stressa, irritert og ironisk klubbdirektør.


Det heile starta for litt over ei veke sida da spelar Kristoffer Strand hadde eigentrening på Voksa Stadium.
- Eg holdt på med skottrening, for klubbleiinga kravde så. Ikkje det at eg forstår kvifor da, men men… Underlaget var fint, men ganske vått. Eg bestemte meg for å skyte eit skot med venstrefoten, men klok av skade skulle eg aldri ha gjort det. Da eg skulle til å smelle ballen i krysset, mista eg  fotfestet og datt handlaust på sida og slo saman føtene så kyrkjeklokkene song!



Strand kom seg fint etter fallet, men han fortel vidare at då han vakna dagen etter, var det vanskeleg å kjenne heilt sikkert kvar smertene kom ifrå.
- Ja, eg var ikkje sikker med det same om det var lysk eller anna, men etter litt analyse fann eg straks ut at det var ein kraftig lyskestrekk eller ein muskelbrest.

Dei første dagane etter klarte ikkje Strand å gå skikkelig på foten og frykta at både kampar for Kvamsøy IL (klubben han er lånt ut til) og cupen skulle ryke. Men ei veke seinare ser ting om ikkje anna litt lysare ut, og Strand forsikrar om at han i vertfall skal vere klar til cupen om ikkje før!
- Ja ein får berre ta tida til hjelp og trene på andre måtar, så får vi håpe at det går over snarast! Så er det ein regel som seier at ”det ikkje er lov til å bruke sko med knottar når det er eigentrening”. Denne regelen vil eg be om at blir fjerna snarast, før også andre blir skada! Avsluttar ein litt småskuffa Kristoffer Strand.
 
VFC-Nett har tok saka om val av egne sko vidare til leiinga som jobbar på spreng for å overbevise banemann Kristoffer Strand om at det ikkje vil gjere for store skadar på den elles så fine grasmatta.
 
Men det var ikkje nok med at Kristoffer Strand skulle skade seg før den prestisjefylte cupen. Onsdag 01.06.11 var denne meldinga å finne på Eirik V. Bringsvors fjesbokkside:
- Alltid festlig å bli stempla, enten det e som idiot eller noke anna... (ispose ♥) jajaja, flott dæ, ei å isposane sete no her å kosa oss å ser på TV!


VFC Nett kan no melde at Eirik V. Bringsvor fekk ei stempling på leggen eller nærare bestemt fotbladet då han spelte kamp for klubben han er utlånt til, nemleg Kvamsøy IL. Foten vart raskt isa ned og halden høgt, men var ikkje gangbar etter kampslutt. Laget gjekk slukøret heim etter 2-2 mot Tjørvåg og glemte nesten og ta med seg ein stivfrosen og skada Eirik på lasset.

 VFC Nett har tatt ein nærmare kikk på den skada foten, som var betydeleg betre dagen derpå. VFC Nett lovar å kome tilbake med oppdateringar snarast vi veit meir om heile denne skade sagaen!



Ballbingen opna igjen og klar for bruk!

Av  Eirik V. Bringsvor 02.06.11
........................................................................................................................................ 

Det er med glede at Voksa Football Club kan formidle at det nye kunstgrasdekket i ballbingen no er lagt og at den er klar for bruk igjen etter ei veke med stenging (i realiteten vart bingen opna for eit par dagar sidan, men pytt pytt).

Det var full aktivitet i og ved ballbingen heile forrige søndag og litt ut på mandagen av fagfolka som var hyra inn for å få jobben gjort. Mandag morgon kunne ein observere spente skuleungar utfolde seg på det nye dekket medan arbeidsfolket tok seg det som måtte vere ein velfortent kaffipause. I dag torsdag 2.juni 2011 tok VFC-Nett turen til ballbingen for å inspisere nyematta - den ellers heilage Himmelsprettsdagen kunne vel strengt tatt ikkje vore brukt til noko meir fornuftig... Uansett var det ei positiv oppleving. Kunstgraset var grønt og granulatet var svart slik som vi trudde.

Nettredaksjonen knipsa også nokre bilder av ballbingen som du kan sjå nedanfor og i fotoalbumet! Voksa FC håper at det nye dekket vil inspirere mange fleire til å ta i bruk bingen, og klubben ser på anlegget som ein god treningsfasilitet.

Ballbingen byr så absolutt inn til finspel, og grastustane er om ikkje anna "litt" lengre enn dei gamle...
Bingen ser bra ut både frå det eine og det andre hjørnet!


VIKTIG MELDING: BALLBINGEN STENGD INNTIL VIDARE!

Av  Eirik V. Bringsvor 25.05.11
........................................................................................................................................ 

Sandsøy IL melder i dag om at ballbingen på øya ikkje er tilgjengeleg for bruk dei neste dagane, inntil det nye dekket blir lagt. Bingen blei i kveld (onsdag) klargjort for legging av nytt dekke, og dette vil etter sigande vere på plass anten laurdag eller i starten av neste veke. Uansett er bingen stengt til dette er gjort. Idrettslaget oppmodar elles alle til å ta i bruk bingen når den er klar i løpet av ei vekes tid. Beskjed vil bli gitt når den er brukande! Voksa FC vil legge til at det er ope for forespørslar vedgåande trening på Voksa Stadium som eit alternativ til ballbingen på Sandsøya.



Årets første trening!

Av  Eirik V. Bringsvor 22.05.11
........................................................................................................................................ 

Dagen er søndag og datoen er 15.mai, vi befinner oss på Voksa Stadium og det er duka for årets første trening på den grøne og fine grasmatta. Både hovudtrenar og assistenttrenar var tilstades under dagens økt, mens det var berre to og ein halv spelar der.


Thomas V. Bringsvor kunne rapportere til VFC-nett at forholda endelig var gode, men pga ei føling på ein strekk i låret kunne han ikkje yte fult og heilt denne gongen. Det er viktig å merke seg at treninga fann stad dagen etter at Kvamsøy IL hadde vore i ei batalje av ein kamp mot rivalen Åheim IL. Den kampen enda i siste sekund med ein 2-2 ”siger” for Kvamsøy IL, dette bar dagens trening preg av og etter kvart var det trenarane som var mest aktive. Det heile enda i ein ”kraftig” duell, som du kan sjå i neste VFC-TV sending som allereie er under produksjon.


Sola var til og med framme og kika idet Eirik V. Bringsvor drog på seg keeperhanskane, og det med god grunn. Han for både høgt og låkt før han ga seg med ein hoven finger. Treninga varte i om lag 1 time og 30min og både trenarteamet og spelarane ser allereie fram til neste trening som ikkje er avklara enda. Klubbdirektør Kristoffer Strand legg til at det er viktig at Voksa FC får samla troppene til eit par kvalitetsfylte treningsøkter før det er duka for cup 18.juni skal vi ha ein sjans!



Gratulerer med dagen!

Av  Eirik V. Bringsvor 17.05.11
............................................................................................... 

Voksa FC vil med dette ønske alle til lukke med nasjonaldagen! Vi håper at både store og små får ein fin dag med mange opplevingar saman. Framover vil det igjen vere mange grunnar til å rette fokus mot VFC, som blant anna har VFC TV-sending, Grendacup og supporterblad på menyen i tida som kjem!



Tabelltips 5.divisjon avdeling 1

Av  Eirik V. Bringsvor 02.06.11
........................................................................................................................................ 

I samband med Kvamsøy IL si seriepremiere i årets 5.divisjon i dag vil Voksa FC kome med eit aldri så lite tips for korleis tabellen vi sjå ut etter 18 spelte serierunder ved sesongslutt i oktober. Som kjent finn vi mange kjente VFC-fjes i rekkene til Kvamsøy, og difor kjenner vi vår besøkstid ved å rette fokus mot denne delen av fotballverda.


Men i dagens kamp finn vi Voksa FC-spelarar ikkje berre i heimegarderoba. Også VFC sin første målscorar i historia, Vegar Prozenko, vert å finne på Haugvoll - altså for bortelaget Åram/Vankam. Vi vil nødig tippe resultatet i dagens kamp, men ÅVK vert rekna som nokså store favorittar. Likevel veit vi kva Kvamsøy kan stelle i stand på gode dagar heime på eige gras. 

Vi veit ikkje veldig mykje om dei andre laga i avdelinga, men vi har fått ein liten peikepinn ettersom fire kampar allereie er ferdigspelte i 1.serierunde. Resultata i desse kampane vart: Larsnes2/Gursken - Bergsøy2 2-2, Gjerdsvika/Moltu - Åheim 2-2, Hasundgot - Tjørvåg 4-1 og Haddal - Flø 2-0. Etter rapportane var kampen på Haddal ikkje særleg velspelt, og vi trur at desse to laga vil kjempe heilt i botnen av tabellen. Vidare set vi spørsmålsteikn rundt både Hasundgot og Tjørvåg, førstnemnde eit lag Kvamsøy tapte knepent 2-1 i ein jamn treningskamp tidlegare i år. Likevel er det sannsynleg at begge laga vil ende på øvre halvdel av tabellen. Hasundgot har mista sine to beste spelarar frå fjoråret til Hareid, men har uansett ein jamnt god tropp. Tjørvåg på si side har fått inn eit par sterke signeringar, blant andre tidlegare Tippeliga-keeper Lars Ivar Moldskred som etter sigande vil få ei spissrolle i moderklubben.

LGFK2 gjorde ein god figur då dei heldt Bergsøy sitt andrelag til uavgjort denne veka. Det unge og litt ustabile Sande-laget vil nok kjempe med Kvamsøy og Gjerdsvika/Moltu om ein 6.-plass, medan Bergsøy2 kanskje kan blande seg heilt i toppen, der vi også tippar at Åheim og Åram/Vankam vil vere. Den soleklare seriefavoritten er uansett utan tvil Åram/Vankam som rykka ned frå 4.divisjon etter ein sterk 6.plass.

Slik trur vi tabellen ser ut til slutt:
1. Åram/Vankam
2. Åheim
3. Bergsøy 2
4. Hasundgot
5. Tjørvåg
6. Larsnes2/Gursken
7. Gjerdsvika/Moltu
8. Kvamsøy
9. Haddal
10. Flø

Diskutér gjerne tabelltipset i diskusjonsforumet vårt som du finn her! Du kan også kome med ditt eige tabelltips eller andre ytringar rundt lokalfotballen!



Styremøte!

Av  Eirik V. Bringsvor 06.05.11
........................................................................................................................................ 

Det var ved 14.03.36-tida tirsdag 03.05.2011 på den velkjente daglegvarebutikken "Vito" i Ulsteinvik, at det tilfeldigvis vart kalla inn til eit tilfeldig hastemøtet mellom klubbdirektør Kristoffer Strand og dagleg leiar Eirik V. Bringsvor ved fruktavdelinga. 
Der vart modne saker som medlemskap, drakter og den høgst aktuelle grendacupen diskutert.

- Både eg og dagleg leiar er ferske i faget når det kjem til cupplanlegging, men vi skal no gjere vårt beste for å få til eit flott arangement, mest truleg 18. Juni. Vi håpar dette vil fange interesse hos dei lokale laga rundt øya slik at vi får til dette, sa ein optimistisk klubbdirektør mens han plukka ein klase med lilla druer og la i handlekurven sin.

Vidare har Voksa FC fått nokre hendvendelsar om medlemskap og både klubbdirektøren og dagleg leiar oppfordrar folk til å ta kontakt via straumpost voksafc@hotmail.com for å melde seg inn. Det er mange fordelar med å være medlem, og du vil kome enda tettare innpå klubben i ditt raude hjarte!



Seint, men godt: VFC TV Påskespesial 2011 endeleg på nett!

Av  Eirik V. Bringsvor 25.04.11
........................................................................................................................................ 

Etter intens jobbing siste døgnet er påskesendinga frå VFC TV endeleg lagt på nett og er klar for å bli sett! Voksa FC beklagar at det har teke så langt tid, men er samtidig letta over at programmet kom ut før påskeslutt - det er kanskje ikkje tilfeldig at VFC TV stod opp frå dei døde nettopp andre påskedag!? Vi oppmodar alle til å delta i årets påskenøtter ved å sende inn løysingsordet til voksafc@hotmail.com! Gå til VFC TV-portalen for å sjå sendinga der!



Siste nytt: Meir VFC TV-krøll

Av  Eirik V. Bringsvor 02.06.11
........................................................................................................................................ 

Sendinga VFC TV Påskespesial 2011 er fiks ferdig og klappa og klar, men likevel har eit problem kome i vegen igjen. TV-redaksjonen slit med å få lasta opp programmet til nettet av uvisse grunnar og det er usikkert om når det let seg løyse. Voksa Football Club beklagar på det ytterste!



VFC TV i full sving!

Av  Eirik V. Bringsvor 18.04.11
........................................................................................................................................ 

TV-redaksjonen i Voksa FC kan i kveld melde at det har vore jobba hardt med innspeling i heile dag og at programmet kjem som planlagt i løpet av veka. Det såg i går veldig grått ut både vêrmessig og TV-messig, men dagen i dag har vore betrakteleg lysare. Dagen i morgon vil bli nytta til å fullføre innspelingane, og det vert redigert med livet som innsats langsmed, dag som natt, for å få ferdigstilt VFC TV Påskespesial 2011!


Vêrtrøbbel for VFC TV

Av  Eirik V. Bringsvor 17.04.11
........................................................................................................................................ 

 Det planlagde påskespesialprogrammet frå VFC TV står no i fare for enten å bli utsett eller kraftig redusert innhaldsmessig pga. det dårlege vêret denne helga. TV-redaksjonen jobbar no hardt med å planlegge alternative løysingar, men det er fortsatt håp om at det vil la seg gjere å gjennomføre filminga i morgon måndag. I denne sendinga kan VFC TV etter planen friste med påskenøtter, Crossbar Challenge og diverse festlige innslag. Så oppmodinga er å vere tolmodige og vente i spenning til programmet forhåpentligvis kjem på nett i løpet av påskeveka!



Voksa Stadium

Av  Eirik V. Bringsvor 12.04.11
........................................................................................................................................ 

Det ser ut til at våren har kommet for alvor til Voksa og det er nok ikkje lenge før graset tek til og vekse seg grønt på Voksa Stadium. I helga som var hadde banemannskapet til VFC sine første arbeidstimar på det elles flotte naturanlegget, men det skulle vise seg at det var langt mellom kvart grønne strå!

Hærverk!
- Ja da æ først kom nepå der å såg kålles det såg ut, så trudd æ at vi hadd vårte utsett fær hærverk. Det såg åsså helt gresse (forferdeleg) ut, det va store områda utn gras, ene måle låg velta og nette bak det anner måle hong i ei bue, sa banemannen i VFC som straks gikk til leiinga i klubben og rapporterte det han hadde sett, og VFC-leiinga tok med ein gong fatt i saka.

Litt av eit syn!
- Nei, det var ikkje eit hyggeleg syn som møtte oss, altså banen. Men etter å ha sett på saka kan vi understreke at det nok ikkje er andre enn kong vinter som har herja med oss - pluss nokre sauer da, understrekar klubbdirektør Kristoffer Strand og fortset.
- Det har dessverre vore ein veldig dårleg vinter med mykje skifting mellom kaldt og varmt, så dette har medført telehiv i marka. Vi har også slite med ubodne sauebesøk som har gjort stor slitasje på den ellers så flotte matta vår.

Mykje å gjere
Leiinga i VFC har mykje å henge fingrane i framover, men understrekar at det å gjere i stand Voksa Stadium er noko av det som kjem fremst i rekka.
 

- Ja sjølvsagt er det slik. Banemannskapet har allereie gjort ein innsats ved å reise opp att det eine målet og fiksa det hengande nettet, men eg er redd dette er den dårlegaste tilstanden eg har sett Voksa Stadium i, og vi har enno ikkje full kontroll over skadeomfanget, seier Kristoffer Strand før han avsluttar:
- Men ein ting er sikkert; anlegget vil vere klart til bruk denne sommaren også!


Ja, så gjenstår det å sjå om Kristoffer Strand har rett. VFC-nett vil uansett vere tilbake med oppdateringar til denne saka så snart det skjer noko.
  

Aprilspøk: Voksa FC signerer keeperveteran

Av  Eirik V. Bringsvor 01.04.11
........................................................................................................................................ 

Ledelsen kunne seint i går avsløre at Voksa FC har lukkast med å signere den fram til no klubblause og tidlegare Strømsgodset-spelaren Lars Ivar Moldskred rett framfor nasen på Larsnes/Gursken FK. Den 32 år gamle keeperen har denne vinteren vore usikker på om han i det heile tatt vil satse vidare, men då VFC kom på bana var det ikkje tvil i hans munn. LGFK kjempa lenge med VFC om å signere Moldskred, men han seier at har ser større potensial i sistnemnde klubb. Det er likevel usikkert om Lars Ivar går rett inn på laget, eller om Voksa FC har sterkare keeperar i klubben allereie. Uansett er dette ei gladmelding og ei god signering for VFC.


Arkivet

 
 
 
Make a Free Website with Yola.