Nyhetsarkivet
Castrol Cup: Voksa FC med heiderleg innsats
Av Eirik V. Bringsvor 30.12.11/31.12.11..............................................................................................................................
Voksa FC kom i dag godt ut av det i innandørsturneringa Castrol Cup i Olivinhallen på Åheim sjølv om ein måtte sjå semifinalen gleppe etter to uavgjorte kampar. I tillegg til desse vart det ein siger og eitt tap. Kamp- og gruppeoppsettet vart endra i tolvte time, og det førte til fire kampar i gruppespelet. Det ekstra laget i gruppe to var Team Rabbane, som VFC forøvrig heldt til uavgjort 1-1. Voksa stilte med berre fem spelarar etter mykje fram og tilbake i natt og i dag morgon med tanke på ein sjette mann. Med tanke på dette var det ein solid innsats VFC la ned for dagen, noko som resulterte i heile ni scora mål.
Skandalene i fotballklubben Voksa FC vil ingen ende ta. Ei heller denne gongen. Tidlegare i veka vart det kjent at det berre var fem spelarar som var sikre til i dag, og etter at Ingar S. Bringsvor måtte melde pass var Stian Sande siste håp for klubben. Torsdag kveld og natt såg det ut som han ville bli med, men fredag morgon kl. 08.17 tikka meldinga om at han dessverre måtte kansellere inn på dagleg leiar sin mobile telefon (sågar med berøringskjerm...). Grunnen var visstnok at han måtte steppe inn på jobb ved Europris i Ulsteinvik pga. sjukdom blant personalet. Dagleg leiar vart ikkje akkurat spesielt overraska, sa han i ein forhasta kommentar.
Men over til det sportslege. Med berre fem tilgjengelege spelarar for fungerande manager for dagen, Sondre V. Bringsvor, låg det an til å bli tøffe kampar fysisk sett. Taktikken var å ikkje bruke meir krefter enn nødvendig i starten for å ha noko att i tredje og fjerde kamp. Alle fem gjorde uansett ein godkjent innsats, og spesielt tredje kampen, mot Team Rabbane, var sterk sidan ein kom tilbake og klarte uavgjort 1-1 etter å ha lege under. Men i likskap med den første var denne ein kamp ein kunne (og kanskje burde) sett ut i frå spel og sjansar. Dette var kanskje det mest positive denne gongen. Ein del scora mål er også verdt å nemne på plussida.
Kampfakta:
Kjell Vigdis BK - Voksa FC 2-2
Mål VFC: Anders Bringsvor, Eirik V. Bringsvor
Lagoppstilling VFC: Magne H. Olsen | Vegar Prozenko - Eirik V. Bringsvor | Anders Bringsvor - Thomas V. Bringsvor
Kampen: Voksa FC gjekk ut og tok kommandoen med sedvanleg innbyttarpuls på alle mann. KVBK var gode dei, men VFC var hakket vassare. Ein leia både 1-0 og 2-1 etter scoringar av Anders og Eirik, men det var meget surt då utlikninga kom like før full tid. Ein grei kamp for Voksa, men det skulle vise seg å bli to skjebnesvangre poeng tapt.
Voksa FC - FC Football 5-2
Mål VFC: Eirik V. Bringsvor 3, Vegar Prozenko, Magne H. Olsen
Lagoppstilling VFC: Magne H. Olsen | Vegar Prozenko - Eirik V. Bringsvor | Anders Bringsvor - Thomas V. Bringsvor
Kampen: Etter nøye studering av dei andre laga i gruppa, fann ein ut at FC Football var eit lag ein berre måtte slå. Og slik gjekk det. VFC valsa over "bortelaget" og leia komfortabelt 5-0 før dei to reduseringane kom etter tidvis slett forsvarsspel. Kampens store høgdepunkt var då keeper Magne H. Olsen scora sitt første mål for klubben. FCF sin keeper var langt ute på skovtur då Olsen nytta høvet til å kaste ballen over heile bana og inn i det opne målet til stor jubel på tribuna! Eirik V. Bringsvor stod også for eit fint mål blant sine tre då han tuppa futsal-ballen i lengste kryss med høgre vesletå.
Voksa FC - Team Rabbane 1-1
Mål VFC: Anders Bringsvor
Lagoppstilling VFC: Magne H. Olsen | Vegar Prozenko - Eirik V. Bringsvor | Anders Bringsvor - Thomas V. Bringsvor
Kampen: Spelarane byrja å merke hardkøyret frå tredje kamp og ut, men likevel stod laget for imponerande moral ved å kome tilbake frå underlege 0-1 i denne kampen. Dette laget var meir kynisk enn dei to første, og dette gjorde det ekstra deilig å få med seg det eine poenget, sjølv om det skulle vise seg å vere to for lite. Det var ikkje meir enn om lag eitt minutt igjen av kampen då Anders Bringsvor tuppa inn den kjærkomne utlikninga for VFC.
Isane Turn & Idrettslag - Voksa FC 4-1
Mål VFC: Anders Bringsvor
Lagoppstilling VFC: Magne H. Olsen | Vegar Prozenko - Eirik V. Bringsvor | Anders Bringsvor - Thomas V. Bringsvor
Kampen: Voksa-spelarane visste kva dei gjekk til i denne kampen etter erfaringa for eitt år sidan. Isane TUIL var då eit eksepsjonelt godt og teknisk velspelande lag, men denne gongen var ein einige etter kampen om at dei var i overkant overlegne i sin oppførsel. Overdriven "kleiing" med ballen og til tider stygt kynisk spel underbygde dette. TIl tross for det leverte VFC igjen ein solid innsats og utlikna til 1-1 like før halvspelt kamp ved Anders Bringsvor. Deretter rakna det litt for Voksa, sjølv om eit tremålstap mot eit slik godt lag ikkje er å forakte. Til samanlikning tapte Voksa FC 5-1 for det same laget i Castrol Cup 2010.
Før cupen: Castrol Cup 2011
Av Eirik V. Bringsvor 29.12.11..............................................................................................................................
Dagen før dagen er her, og i det høvet kjem vi med ein siste statusrapport før Castrol Cup. Du finn her all praktisk informasjon og status for mannskapet Voksa FC sender til Åheim. Sondre Voksøy Bringsvor trer for n-te gong inn i rolla som fungerande manager i Lasse Strand Gule sitt fråver.
Først litt praktisk informasjon for spelarar og eventuelt for supporterar som vil møte opp og støtte laget:
- Avreise 08.45 frå Voksa.
- Ankomst Åram 09.00 og Åheim ca. 09.45 (om alt går smertefritt).
- Oppvarming og registrering snarast mogleg deretter.
- Første kamp kl. 10.00 (deretter kl. 10.30 og 11.30).
- Eventuelt sluttspel 12.00-12.40 (kvartfinalar), 13.20-13.40 (semifinalar) og 14.25-14.35 (finale).
- Tilbake frå Åram anten 14.00 eller 16.15.
Det vart i dag gjennom eit uoffisielt styremøte via mobiltelefon vedtatt at kvar spelar betalar 150 kr i bidrag til påmeldingskontigenten som er på 1000 kr. Klubben står for resten (anten 250 eller 100 kr alt etter kor mange spelarar). Dette er fordi klubbkassa per dags dato er ganske mager pga. små inntekter det siste halvåret!
Voksa FC stiller med dette mannskapet:
Ingar Støyle Bringsvor har den siste tida site på vippen med lånt betenkningstid. Klubben har til det siste håpa at han ville gi klarsignal for å bli med, men for n-te gong ei. Heller ikkje denne gongen får han sin debut for Voksa FC! Etter denne beskjeden i dag, har VFC jobba hardt med å avklare om Stian Sande har intensjonar om å stille opp og gjere ein innsats i morgon. Det har lenge vore usikkert om Sande kan vere med, då han er i ein omfattande jobbsituasjon ved Europris Ulsteinvik. Dei fem som etter alt å dømme likevel er sikre til dyst fredag er; Anders Bringsvor, Eirik Voksøy Bringsvor, Thomas Voksøy Bringsvor, Vegar Prozenko og Magne Hauge Olsen.
Her er ei vurdering for kvar enkelt:
Anders: Har i det siste trent bra på den fysiske sida, men har sjølv påstått at "ballforma er skral". Om det er fotballforma han siktar til, skal likevel vere usagt. Godt over 100 besøk på Rinden (369 moh) hittil i år seier vel sitt. Den siste veka har han i tillegg til diverse høgdetrening finpussa touchen gjennom to "balløkter" i ballbingen. Frykta er likevel stor for at ting skal gå i ball...
Eirik: Rykta seier at Voksa FC sin nummer 9 har vore både høgt og lavt siste tida. Han skal visstnok ha gjennomført eit kondisjonsprogram på åtte veker med 16 økter 4x4 intervalltrening sidan oktober. I jula har også geografien på Sandsøya vorte brukt. Ballforma skal vere ok, men ikkje noko meir. Seks fotballtreningar med juniorlaget til Hødd før jul har vel også vore positivt. C-momenta à la Anders er det likevel lenge mellom innandørs (såvel som ute), men innsats lovar han i alle fall.
Thomas: I år som i fjor kom han som ei openberring frå det store intet til Sandsøya nokre dagar før jul. Det store intet er i år som i fjor trønder-hovudstaden, og ingen veit kva trening som har vorte lagt ned der. Slapp likevel den medisinske testen i år. Har testa forma gjennom tre økter i ballbingen sidan heimkomsten, og ser ut til å vere der han bør sportsleg sett. Står saman med Anders for rutine og erfaring som kan kome godt med.
Vegar: Ingen i Voksa FC sine indre kretsar set spørsmålsteikn ved han. Fysisk er han alltid tipp-topp, og også teknisk er han over gjennomsnittet i klubben. Treng vel knapt ein nærmare presentasjon etter at han vart tidenes første målscorar for VFC i fjorårets turnering.
Magne: Voksa FC sin nye superkeeper gjorde sakene sine eksepsjonelt godt i sommarkampane i både Grendacupen og ÅVK Summer Games. Vi er på bakgrunn av dette sikre på at han også denne gongen vil gjere ein solid jobb. Det er likevel usikkert i kor stor grad keepertrening har vorte lagt ned siste tida. Ein potensiell matchvinnar som kan bli viktig i avgjerande situasjonar.
Ein håpa også i det lengste å få med Stian Sande som ein sjette mann, men det har framleis ikkje lukkast VFC å få kontakt med han. Tidlegare i veka var Stian i ballbingen og trena med dei andre, men sidan det har ingen verken høyrt eller sett noko.
Vurdering av motstandarane i Castrol Cup
Av Eirik V. Bringsvor 27.12.11/29.12.11..............................................................................................................................
Det nærmar seg no med orkansteg fredag 30.desember og innandørsturneringa Castrol Cup i Olivinhallen. For å gjere ventetida enklare, har vi i VFC Nett difor gjort ein grundig gjennomgang av laga Voksa FC skal møte i gruppespelet og eventuelle motstandarar om VFC går vidare frå gruppe 2. Laga er som kjent Kjell Vigdis BK, Isane TUIL og FC Football.
Kampoppsettet for Voksa FC ser slik ut:
K6 10.00 Voksa FC - FC Football
K9 10.30 Kjell Vigdis BK - Voksa FC
K15 11.30 Voksa FC - Isane TUIL
Første motstandar, FC Football, er eit nytt bekjentskap for Voksa FC. Laget deltok ikkje i CC for eitt år sidan, og vi har elles aldri hørt eller sett noko om dette! Det er verdt å merke seg at lagnamnet er henta frå fotballprogrammet til TV2 Sporten som i hovudsak handlar om engelsk fotball. Kanskje er dette ein gjeng sofagrisar som har det mest mellom øyrene og i mindre grad i beina? Det er i alle fall lov å håpe...
I den andre kampen står Kjell Vigdis BK for tur. Vi har merka oss at denne kampen kjem berre 20 minutt etter at den første er ferdigspelt. KVBK spelar sin opningskamp 09.30, så det er mogleg at denne skilnaden vil spele inn på resultatet. Når det gjeld sportsleg historikk og resultat, har Voksa FC sine opponentar i dette tilfellet meir å skilte med enn det vi har. Kjell Vigdis BK gjorde ein sterk figur i gruppespelet i fjorårets turnering med to sigrar og eitt tap i ei solid gruppe. Siger 5-0 i første kamp, tap med same siffer i kamp to, og siger 2-1 i siste gruppespelskamp. Med det gjekk laget vidare til kvartfinale, men til gjengjeld stoppa eventyret der etter tap 2-1 mot laget Jimmies.
KVBK deltok også i 2009, men gjekk då ikkje vidare frå gruppespelet etter to tap og ein siger. I 2008 vart det to sigrar og ein uavgjort kamp. Då enda det med tap 2-0 i semifinalen mot det sterke laget Julebruskongane. Kjell Vigdis BK kjem etter alt å dømme frå Selje-området og spelarane er etter rykta rundt 20-30 år gamle.
Isane Turn & Idrettslag treng knapt nærare presentasjon. Dette laget møtte Voksa FC også i fjorårets turnering. Då fekk VFC ein leksjon i innefotball då ein vart rundspelt med tap 5-1. Ikkje overraskande gjekk laget heile vegen hen og vann like godt Castrol Cup 2010! Med tanke på det var kanskje firemålstapet så gale likevel, og i alle fall var kampen ei god erfaring. I år veit ein kva ein går til, og kanskje får vi ei positiv overrasking?
I ein eventuell kvartfinale er det veldig vanskeleg å spå kven Voksa FC mest sannsynleg møter om ein klarer bragda å gå vidare frå gruppe 2. Sjansane er likevel ganske gode, sidan beste trear av gruppene 1 og 2 går vidare i tillegg til dei to beste. Blir VFC nummer tre (og betre enn nummer tre i gruppe 1), møter ein vinnaren av gruppe 3. Her spår vi at laget Marita Krøvel blir motstandar, utan at vi kjenner til dei andre laga. Om Voksa skulle gå hen og vinne si gruppe, er nummer to frå gruppe 3 motstandar. Vert VFC nummer to, møter ein vinnaren av gruppe 1. Kanskje vert det eit gjensyn med Hard 2 Get, som ein tapte knepent 1-0 mot for eitt år sidan. Uansett krev dette at Voksa legg ned ein solid innsats, og helst vinne to av tre kampar i gruppespelet.
Eit eventuelt sluttspel ser slik ut:
Kvartfinalar:
K18 12.00 Vinnar gr. 3 - Beste trear gr. 1/2
K19 12.10 Vinnar gr. 2 - Andreplass gr. 3
K20 12.20 Vinnar gr. 1 - Andreplass gr. 2
K21 12.30 Andreplass gr. 1 - Tredjeplass gr. 3
(Eventuelle kampar for Voksa FC er understreka)
Semifinalar:
K26 13.20 Vinnar kamp 18 - Vinnar kamp 19
K27 13.30 Vinnar kamp 20 - Vinnar kamp 21
Finale:
K34 14.25 Vinnar kamp 26 - Vinnar kamp 27
Seinast torsdag kveld vil vi kome tilbake med meir nytt om årets siste "happening" for Voksa FC og også litt om eige lag og ståa i klubben sportsleg sett!
God jul!
Av Eirik V. Bringsvor 24.12.11..............................................................................................................................
Voksa Football Club vil på vegne av heile klubben nytte høvet til å ønske alle ei retteleg god og fredeleg jul! Måtte alle som støttar VFC på ein eller annan måte få ei fin-fin julehøgtid med nokre sannsynlegvis etterlengta fridagar. Men allereie om seks dagar må julematen vere fordøygd, for då skal klubben sitt fremadstormande mannskap igjen til pers når Castrol Cup står for tur. Men i mellomtida; god jul til store og små!
Kampoppsettet klart!
Av Eirik V. Bringsvor 22.12.11..............................................................................................................................
Kampoppsettet for Castrol Cup fredag i komande veke er no klart. Voksa FC kom i gruppe 2 saman med Kjell Vigdis BK, Isane Turn & Idrettslag og FC Football. Det er verdt å merke seg at VFC møter Isane TUIL som ein også gjorde i fjorårets turnering. Då vart det braktap 5-1 i gruppespelet, og i tillegg gjekk Isane heile vegen til topps i finalen. Dei andre laga veit vi mindre om. I tida fram mot cupen den 30.desember, vil vi kome tilbake med meir om cupen, motstandarar og eige lag!
ÅVK Summer Games
Av Kristoffer Strand 21.11.11..............................................................................................................................
Klubben i sin heilskap gratulerer seint, men godt, med solid innsats under årets ÅVK Summer Games! Det har vore i klubben sine auge vore retta for lite merksemd mot den forrykande innsatsen Voksa FC gjorde då dei enda opp med ein MEGET respektabel andreplass i turneringa. Klubbeigar Adrian Tístan var ein av mange som var imponert over kva klubben hadde fått til, og det ser endeleg ut til at Voksa FC har markert seg på kartet og viser at dei meiner alvor.
Mediateamet var godt på plass også under denne turneringa, men med ein engelskmann bak kameraet som til tider var meir oppteken av colaflaska si enn kampen, seier det vel seg sjølv at kampane kjem i samandragsform og ikkje som heilskap. Tekniske problem høyrer også med i denne bransjen, så de som nesten ikkje kan vente lenger i spenning, må nok vente litt til før dei første TV-bileta blir lagt ut.
VFC Nett vil kome tilbake med meir omdette snarast det blir framdrift.
Voksa FC, kva er det?
Av Kristoffer Strand 17.11.11..............................................................................................................................
Som venta har det ikkje vore mykje vind i seglet for Voksa FC denne hausten, men fortvil ikkje; alle båtar har vel eit sett med årar om bord berre ein finn dei..? Som nemnt tidlegare, har klubbleiinga splitta opp og gått kvar til sitt, dette har ført til at rykta, som i alle andre klubbar, har svirra som grasklipparen på Voksa Stadium om at klubben står for fall.
Rykter som: "Usemje i VFC-leiren har ført til splitting av Voksa FC-leiinga", "raude tall og berre ball hos VFC", "kven kan segla for utan vind", "nok ein klubb utan ambisjonar" osv...
Dette har vore vanlege avisoppslag denne hausten, og har ført til mang ein spekulasjon om Voksa FC si framtid, men då klubbdirektør Kristoffer Strand endeleg løfta røret her om dagen og hadde tid til eit kjapt intervju, nøla ikkje VFC Nett med å setje han i offside.
På spørsmål som "kva skjer, har du kontroll på klubben?", "Har leiinga krangla?", "Er det peng i klubbkassa?", "Har du vore med i jakta på kjærleiken?", "Er det nokon nye spelarar i kikkerten?" svarte ein roleg, og elles så lang i praten, klubbdirektør at:
- Tid veks ikkje på tre, den går langs vegen.
Det var alt klubbdirektøren ville dele med VFC Nett for denne gang, dei fleste sit kanskje att som kniv i sirup og eit løfta augebryn, men fortvil ikkje, våre ekspertar har gjort eit forsøk i å tolke klubbdirektøren sine "kloke ord" og har kome fram til det han eigentleg meiner:
"Det meste ser ut til å vere i skjønaste orden, tida går, ho heng ikkje stille på ei grein. Når det kjem til kjærleik så går rykta om at juletreet er høgd i ei lita bygd i trøndelagsområdet. Sist, men ikkje minst; ein har alltids ein spelar eller to i kikkerten".
Våre ekspertar understrekar at dette er ei tolking, og kan dermed vere delvis sann eller totalt usann. Altså ta tolkinga med ei klype salt eller kanskje heile saltbørsa!
Voksa FC tilbake der det starta - påmeldt til Castrol Cup 2011
Av Eirik V. Bringsvor 16.11.11..............................................................................................................................
Den siste veka har klubben hatt spelaroppteljing for å finne ut om VFC forsatt har eit lag. Resultatet vart at ein bestemte seg for å melde laget på til innadørsturneringa Castrol Cup som går av stabelen i romjula. Dette på bakgrunn av at 6-7 spelarar sa seg interesserte i å forsvare VFC-drakta. Laget er no bekrefta påmeldt, og ein vil framover prøve å få samla troppene for å undersøke om påmeldinga var klok eller ikkje! Voksa deltok som kjent i fjorårets turnering som også var klubben første offisielle opptreden. Meir om cupen, laget, og klubben elles vil vi kome tilbake til etterkvart det nærmar seg!
Meeget lenge sidan sist
Av Eirik V. Bringsvor 17.09.11..............................................................................................................................
Dessverre er det no både dagar, veker og månadar sidan det har vore aktiv aktivitet verken her på nettsida eller i det fysiske livet for Voksa FC. Den enkle grunn er at tid som kjent er mangelvare. Grunnen er IKKJE at klubben vart "mett" etter suksessen på ÅVK Summer Games i starten av juli, men etter den gong har opptil fleire omstende gjort sitt til at klubbverksemda har vorte lagt på is. Fortvil likevel ikkje, for litt etter litt vil det forhåpentlegvis røre seg i Voksa Football Club igjen!
Det var fleire ting som gjorde at vår kjære og etterkvart nokså kjente fotballklubb gjekk i dvale: Klubbdirektøren hadde ein velfortent sommarpause/-ferie etter dei sportslege bragdene og var borte i lange perioder, same mann gjorde deretter ei forutsett flytting til Surnadal for vidare studier i slutten av august, dagleg leiar (etterkvart kjent som nattleg sådan) hadde meir enn nok å henge fingrane i då det nye skuleåret overraskande nærma seg med orkansteg, den nytilsette sjefen for kvalitetssikring tok plutseleg ikkje jobben sin like seriøst (kanskje pga. lite å sikre...) og reiste likegodt tilbake til trønderbyen forrige månad etter ein sjølvutnemnt - men ikkje velfortent - trevekers ferie, og i sum gjorde alt dette at dei involverte i alt det som skulle skje aldri var på same stad til same tid.
"Tida går, Voksa FC består" må vel då verte det nye slagordet i klubben, for sjølv om det har vore stille rundt klubben, så har vi ingen planar om å verken gå konkurs, legge oss i opplag, eller stille oss ut på museum. Framover vil vi no prøve å kome i gang igjen på umiskjenneleg vis. Det er mange ting som skal takast opp:
- VFC TV: Fyldig gjennomgang av den suksessfulle ÅVK Summer Games, i tillegg til nye sendingar med diverse snacks.
- Voksa-patrioten: Medlemsbladet som skulle kome ut i sommar vil vi no gjere eit nytt forsøk på å distribuere til alle våre medlemmar.
- Supporterklubben VFCSC: Verving av nye medlemmar i tillegg til nye tilbod for dei "gamle" (og evt. nye).
- VFC Nett: Her på nettsida vil det med ujamne mellomrom kome nytt av ymse slag, og vi ser etterkvart framover mot nye bragder (les: Castrol Cup 2011).
VFC TV: Sjette utgåve endeleg lasta opp!
Av Eirik V. Bringsvor 12.07.11..............................................................................................................................
Sjette utgave av VFC TV er no klar for å bli sett etter litt kluss dei siste dagane. Sendinga skulle eigentleg kome ut fredag kveld, altså før ÅVK Summer Games, og handlar derfor ikkje om resultata der (det kjem i neste sending). Denne gongen får vi ein grundig gjennomgang av Grendacupen VFC arrangerte i juni. I tillegg serverer TV-redaksjonen eit gjensyn med banemannen og VFC Duellen, og sidan det er den siste sendinga for sesongen 2010/11, vert vinnar av både påskenøtter og quizane utnemnt!
ÅVK Summer Games: Voksa FC gjekk heile vegen til finalen!
Av Eirik V. Bringsvor 09.07.11/12.07.11..............................................................................................................................
Det vart lagets beste prestasjon i klubbhistoria då Voksa FC tok ein solid og litt overraskande andreplass i dagens ÅVK Summer Games på Eidsåvoll i Vanylven. Spelarar og spelande assistenttrenar Sondre V. Bringsvor (som fekk sin debut) var godt nøgde med dagen etter seks solide kampar, sjølv om det enda med klart 0-4-tap for vinnarlaget Oddvins All Star i finalen. Anders Bringsvor vart kåra til lagets beste spelar i finalen, og klubben fekk god PR som til dømes fotografering av brødrene Sondre, Eirik og Thomas Voksøy Bringsvor frå Synste Møre. Alt i alt ein opplyftande dag for det fremadstormande VFC-laget.
Det var på papiret ei vanskeleg gruppe Voksa FC hadde kome i, i alle fall hardare enn den andre gruppa, fann spelarane raskt ut etter å ha sett litt på motstandarane tidleg i cupen. Åpningskampen var mot det som måtte vere eit bedriftslag, Goal Harvest, men det var god motstand som møtte VFC-laget. Det var stillingskrig frå start til slutt, og ingen av laga makta å setje ballen i nota. Voksa FC styrte det meste dei siste minutta - det såg ut som at Goal Harvest vart raskare slitne enn dei raude og svarte. Eit poeng og godt forsvarspel i tillegg til ein lovande start på cupen for VFC.
Dei oppegåande VFC-spelarane, med sjef for kvalitetsikring Thomas V. Bringsvor i spissen, konkluderte med at dei to neste kampane sannsynlegvis måtte vinnast om ein skulle nå semifinalen sidan den siste kampen mot gode Oddvins All Star nok ville bli for hard å knekke. Og slik gjekk det også. Johannes Vartdals og Quill94 vart slått 2-1 og 3-1 før "stjernene" med Oddvin Kragset som keeper vart for sterke i siste gruppespelskamp og vann 1-0. Kanskje litt overraskande, men dog: Semifinale var eit faktum for Voksa FC!
Der møtte VFC laget med det rare namnet Smolt og Vrakfisk. På "papiret" ein tøff kamp, men Voksa FC spelte seg opp utover dagen, og ein ny og solid 3-1-siger sendte Voksa Football Club til finale framfor Eidså-publikumet. Oddvins All Star som slo Flø i sin semifinale, var i finalen igjen motstandar for VFC. Denne gongen løyste spelet seg litt meir opp, slik at det til slutt enda 0-4 i Voksa FC sitt disfavør. Ein komfortabel siger for det klart beste laget i turneringa, men VFC-laget kunne vere godt nøgde med ein solid andreplass! Som plaster på "såret" fekk Anders Bringsvor utmerking frå arrangøren for å vere VFC sin beste spelar i finalen. Ein kjempestart på sesongen 2011/12!
Kampfakta
Gruppespel:
Goal Harvest - Voksa FC 0-0
Lagoppstilling VFC: Magne H. Olsen | Vegar Prozenko - Eirik V. Bringsvor | Thomas V. Bringsvor - Anders Bringsvor
Innbytte: Kristoffer Strand
Voksa FC - Johannes Vartdals 2-1
Mål VFC: Vegar Prozenko, Eirik V. Bringsvor
Lagoppstilling VFC: Magne H. Olsen | Vegar Prozenko - Eirik V. Bringsvor | Thomas V. Bringsvor - Anders Bringsvor
Innbytte: Kristoffer Strand
Quill94 - Voksa FC 1-3
Mål VFC: Anders Bringsvor 2, Thomas V. Bringsvor
Lagoppstilling VFC: Magne H. Olsen | Eirik V. Bringsvor - Thomas V. Bringsvor | Anders Bringsvor - Kristoffer Strand
Innbytte: Vegar Prozenko og Sondre V. Bringsvor
Voksa FC - Oddvins All Star 0-1
Lagoppstilling VFC: Magne H. Olsen | Vegar Prozenko - Thomas V. Bringsvor | Kristoffer Strand - Anders Bringsvor
Innbytte: Eirik V. Bringsvor
Semifinale:
Voksa FC - Smolt og Vrakfisk 3-1
Mål VFC: Eirik V. Bringsvor 2, Kristoffer Strand
Lagoppstilling VFC: Magne H. Olsen | Vegar Prozenko - Thomas V. Bringsvor | Kristoffer Strand - Eirik V. Bringsvor
Innbytte: Anders Bringsvor og Sondre V. Bringsvor
Finale:
Oddvins All Star - Voksa FC 4-0
Lagoppstilling VFC: Magne H. Olsen | Vegar Prozenko - Anders Bringsvor | Thomas V. Bringsvor - Eirik V. Bringsvor
Innbytte: Kristoffer Strand
Før cupen: ÅVK Summer Games 2011
Av Eirik V. Bringsvor 08.07.11..............................................................................................................................
Det vart i dag klart kven Voksa FC skal møte i gruppespelet i ÅVK Summer Games komande laurdag. Arrangøren har delt inn i to grupper med fem lag, der dei to beste frå kvar går vidare til semifinale. VFC kom i gruppe med Goal Harvest, Quill94, Johannes Vartdals og Oddvins All Star. Det vert spennande å sjå om Voksa-laget kan hevde seg, men nålauget for semifinale er nokså trangt og smalt.
Som start på sesongen 2011/12 tek Voksa FC turen over "dammen" og til Eidsåvoll. I gruppespelet er det fire kampar, og maksimalt kan dagen by på heile seks VFC-kampar - om alt går over forventning!
Tropp Voksa FC:
1 Magne Hauge Olsen
3 Vegar Prozenko
6 Anders Bringsvor
9 Eirik V. Bringsvor
11 Thomas V. Bringsvor
14 Kristoffer Strand
Kampar i gruppespelet for Voksa FC:
K1 12.20 Goal Harvest - Voksa FC
K2 13.30 Voksa FC - Johannes Vartdals
K3 14.20 Quill94 - Voksa FC
K4 14.50 Voksa FC - Oddvin All Star
Eventuelle kampar i sluttspelet:
Semifinale 1 15.20 Nr. 1 gr.1 - Nr. 2 gr. 2
Semifinale 2 15.30 Nr. 2 gr. 1 - Nr. 1 gr. 2
Laga i gruppe 1: Flø, Smolt og Vrakfisk, Marie Humberseth, Midthjell/Lefdal Grendalag og Team Pokemon.
Det er eigentleg ganske vanskeleg å spå korleis det vil gå for Voksa FC, sidan vi ikkje sit på informasjon om dei andre laga. Kvar kamp er på berre 9 minutt, så troppen på seks spelarar bør vere sterk nok. Assistenttrenar Sondre V. Bringsvor vil styre skuta i Lasse Strand Gule sitt fråver. Målet til VFC bør vere å gå vidare frå gruppa sjølv om det skulle vise seg å vere vanskeleg. Det einaste ein kan forlange er maksimal innsats!
|
Kampoppsett ÅVK Summer Games 2011.doc Size : 66.5 Kb Type : doc |
|
Kampoppsett ÅVK Summer Games 2011.docx Size : 27.489 Kb Type : docx |
VFCSC: Medlemsbladet ute i desse dagar!
Av Eirik V. Bringsvor 12.07.11..............................................................................................................................
Alle som er medlem av supporterklubben kan no glede seg - medlemsbladet er ferdig, og vil bli distribuert i løpet av ei vekes tid! Men fortvil ikkje om du ikkje er medlem: Vi har no ein "pakkepris" for medlemskap med bladet inkludert i prisen for 50 kr. Ta kontakt om du er interessert!
I den aller første utgåva av Voksa-patrioten, som namnet er, får du servert mellom anna dette:
- Spelarstall 2010/11
- Kampar/resultat sesongen 2010/11
- Sesongoppsummering
- Grendacup 2011
- Eksklusivt intervju med banemannen
Små og store augneblink frå Grendacupen
Av Kristoffer Strand 01.07.11..............................................................................................................................
Det var ein innhaldsrik Grendacup som vart avvikla på Oshaugane stadion den 18.06.11. Det var som kjend både drama på og utanfor bana, og etter nokon sin smak kanskje vel mykje da ambulansehelikoptret landa for andre gong men ungane såg ut til trivast med den flygande attraksjonen. Det er viktig å nemne at dei to som vart frakta med helikoptret no har det etter forholda bra og håpar at dei raskt kjem seg på fotballbanen att. Vi takkar nok ein gong Larsnes for den flotte innsatsen under Grendacupen og håpar å sjå dei att neste år igjen.
Det er vert å nemne at heile 4 spelarar debuterte for Voksa FC under turneringa, den største overraskinga var vel då fotograf og domar Endre Vorren (35+) sette seg på innbytarbenken og kravde ei drakt. Det fekk han så i andre kamp. Då Voksa FC spelte mot Åram, sneik han seg utpå banen og inntok posisjon som ”lynving”. Så er vel spørsmålet då om farta var like god som i gamle dagar, men berre etter nokre minutt på banen gav Åram opp å angripe på høgre sida til VFC. Elles så var det ein fornøgd men sluttkjørt Endre Vorren som gjekk av bana og enda med éin respektabel kamp for Voksa FC.
Vidare debuterte Lasse Strand (13) som allereie etter få minutt elegant runda Larsnes si målvakt før han sleiva ballen ein meter tilside for mål. Vi reknar med at han no vil gå under tilnamnet ”spelandemanager” i framtida. Emil Sandsbakk (16) debuterte også og var involvert i samtlege kampar under Grendacupen med god innsats. Den siste debutanten skal vi sjå litt nærare på i ei ega sak men så godt som han sto i mål håpar VFC at han er komen for å bli.
Kristoffer Strand (19) opna til slut den etterlengta skåringskontoen sin med heile 2 fulltreffarar og vart med det delt toppskårar i turneringa. Meir imponerande var det at Voksa FC hadde før sjølvmålet mot Åram spelt nesten 100 minutt utan eit einaste baklengsmål! Då er det kanskje ikkje så rart at det måtte ein VFC-spelar til for å få hull på byllen? Ein annan merkeleg ting var da den ettertrakta Voksa FC spelaren Vegar Prozenko stilte i feil drakt og for feil lag under Grendacupen. Det ryktast at han no framover må jobbe ekstra hardt for å vinne tilbake VFC-supporterane sine hjarter og tilitt for ikkje minst å stille opp på rett banehalvdel neste gong!
Som vanleg så kjem dommarane i fokus under ei turnering, men denne gongen positivt (i alle fall for Voksa FC sin del). Først og fremst vart det ikkje delt ut eit einaste kort under heile turneringa, men det var før dommar Tor Arne gav fotograf Aina Strand raudt kort for filming. Det gjekk også hardt utover dommar Svein Helge Bringsvor som etter mykje om og men dømte finalen i årets Grendacup. Han vart nemleg før kampen beskylt for å vere sterkt i slekt med halve Voksa FC laget, men det avkrefta assistenttrenar Sondre V. Bringsvor, spelar Eirik V. Bringsvor og Thomas V. Bringsvor saman med kapteinen Anders Bringsvor på det sterkaste, og dermed fekk Svein Helge Bringsvor døme finalen som planlagt.
Dermed var Grendacupen 2011 eit faktum og VFC leiinga vil igjen takke alle involverte i cupen og Arnvald Bringsvor for merking og stelling av bane, Ingrid Bringsvor Voksøy og Monica Sandsbakk for diverse jobbing som inngangsvakter, Aina Strand for fiksing og triksing av diverse (også filming og bildetaking), ho kan no attpå til vente seg tittelen ”sekretær”, og takk til Monica Voksøy Bringsvor som filma store deler av cupen sjølv om kanskje VFC’s eiga målvakt kanskje kom litt vel mykje i fokus.
Arkivet
...........................................
Juli-desember 2011 (du er her)
